БИШКЕК, 24-дек. — Sputnik. Каракол шаарында бейшемби күнү көп кабаттуу үйдүн батиринде өлтүрүлгөн тестиер кыз менен жарадар болгон кичинекей бала табылды. Бул туурасында ИИМ билдирди.
Алдын ала алынган маалыматтарда, Горький көчөсүндөгү үйгө ууруга киргендер балдарга кол салган.
"Кыязы, кылмышкер жалгыз эмес, эки же андан көбүрөөк киши болгон. Балдардын денесинин ар кайсы жерлерине бычак урулган. Он жашар кыз ошол жерден эле жан берген, ал эми жети жаштагы бала оор абалда ооруканага жеткирилген", — деп билдиришти ИИМден.
Ысык-Көл облустук ооруканасынан жети жаштагы эркек бала башынан жаракат алгандыгын билдиришти.
Кылмыш болгон жерде ИИМдин эксперттери иштеп жатат. Кылмышкерлерди издөө боюнча зарыл болгон иштер жүргүзүлүүдө.
