БИШКЕК, 10-окт. — Sputnik. Тажикстанда эки кыргызстандык жаран адамдарды аскердик аракеттер жүрүп жаткан Сирияга үндөөгө шектелип кармалганы коңшу мамлекеттин ИИМнин расмий сайтына жарыяланды.
Баткен облусунун тургундары болгон Жахонгир Курмишев менен Каныбек Ниманов Согду облусунун милиция кызматкерлери тарабынан Лаккон жамаатынын Дахан айылында колго түшүрүлгөн.
ИИМ кармалган жарандар 25-сентябрда мамлекеттик чек арадан мыйзамсыз өтүп, аталган айылдан Тажикстандын жарандары Дилафруз Шербекованы кызы менен, Олмахон Шербекованы эки баласы менен жана Кумри Муминованы уулу менен тосуп алышканын белгилейт.
"Алар аталган тажик жарандарын Бишкекке алып келип, андан соң жасалма документтин негизинде Түркияга жиберүүгө аракет кылышкан. Мындан кийин алар учурда аскердик аракеттер жүрүп жаткан Сирияга кетишмек", — деп айтылат билдирүүдө.
Кыргызстандык жарандарга карата Тажикстандын кКылмыш жаза кодексинин 32-беренесинин (кылмышка даярдоо жана ага түртүү), ошондой эле 401-беренесинин (жалданмачылык) негизинде кылмыш иши козголду. Учурда тергөө амалдары жүрүп жатат.
