БИШКЕК, 11-сен. — Sputnik. Бишкек шаарынын өрт өчүрүүчүлөрү ТЭЦте чыккан өрттү эки саат бою өчүрүштү. Тилсиз жоо 570 чарчы метр жерге жайылганын ӨКМдин өрткө каршы күрөшүү кызматынын жетекчиси Нуржан Осмоналиев Sputnik агенттигине билдирди.
Өрт тууралуу билдирүү кечээ түнкү саат 10:40та келип түшкөн.
"Өрттү өчүрүүгө төрт машина тартылып жана ТЭЦтин атайын машинасы да жардам берди. Жабыр тарткандар жок", — деди Осмоналиев.
Анын айтымында, тилсиз жоо түнкү саат 12:42де өчүрүлгөн.
Өзгөчө кырдаалдар министрлигинин маалыматына ылайык, ТЭЦтин цехиндеги 50 чарчы метр жыгач устундуу шифер жабылган чатыр, ичинде 4 станок, көмүргө аралашкан 3 тонна мазут, конвейер, резина ленталар, кабелдер күйгөн.
Ал эми өрт өчүрүүчүлөрдүн алдан ала берген маалыматына ылайык, өрт электр зымдарынын чыңалуусунан улам чыккан.
