БИШКЕК, 24-июль — Sputnik. Ала-Бука районуна караштуу Көк-Серек айылынын 50гө жакын тургуну "Бозумчак" кенин иштетүүчү "Казакмыс Голд Кыргызстан" компаниясына бир нече талаптарды коюп, жол тосуп турушат. Бул туурасында Көк-Серек айыл өкмөтүнүн башчысы Камчыбек Исраилов Sputnik маалымат сайтына билдирди.
Маалыматтарга караганда, алар жолду эртең менентен баштап тоскон. Алар "Бозумчак" кенине айылды аралап кетчү жолду асфальттап берүүнү жана жергиликтүү элден компанияга ишке көбүрөөк алууну талап кылышууда.
"Жолду эртең менен саат 11лерге чукул тосо башташкан. Митингге чыккандар компаниянын өкүлдөрүнүн келишин талап кылышууда",— деди Исраилов.
Бул боюнча маалымат тараткан "Казакмыс Голд Кыргызстан" компаниясы жол тосуу көрүнүшүнө тынчсыздангандыгын билдирип, жергиликтүү эл менен өнөктөштүк мамиледе болууга кызыкдарлыгын, жол тосууну айрым бир тараптар уюштуруп жаткандыгын айтышты.
"Митингге чыккандардын компанияда иштегендердин 70 пайызы жергиликтүү элден болушу керек деген талабы күмөн гана жаратат. Мындай көрүнүш аймактар аралык аралык араздашуунун отун жандырышы мүмкүн, буга мамлекеттик органдар тиешелүү баа бериши керек. Биз үчүн кыргызстандыктардын бардыгы бирдей. Комбинатта иштегендердин 60 пайызы Жалал-Абад облусунун жашоочулары, алардын 50 пайызы – жергиликтүү жашоочулар", — деп айтылат компания тараткан билдирүүдө.
"Бозумчак" кен жайы Жалал-Абад облусунун Ала-Бука районуна караштуу Көк-Таш айыл аймагында жайгашкан. Ал жерден негизинен жез алынат, андан сырткары, аз санда алтындын кору бар. Кенди казакстандык "Казакмыс" корпорациясы иштетет.
