БИШКЕК, 20-фев. — Sputnik. Ак-Талаа районундагы Жерге-Тал айылынын үч тургуну – 1993-жылы туулган Жээнбай уулу Мирбек, 1982-жылы туулган Адылбек Төлөнбаев жана 1986-жылы туулган Шераалы уулу Уланбек бейшемби күнү, 18-февралда Кашка-Суу ички жайлоосуна жылкы айдап келүү үчүн барып, кар көчкүдө калган. Бул тууралуу Өзгөчө кырдаалдар министрлиги билдирди.
Маалыматка ылайык, аталган кырсык тууралуу маалымат ӨКМнын Ак-Талаа райондук бөлүмүнө 19-февралда саат 13:00дө берилген.
Ак-Талаа районунун акими жарандык коргонуунун башчысынын жетекчилигиндеги райондук жарандык коргонуу кызматтарынан түзүлгөн ыкчам тобу Жерге-Тал айылына барышып, жеринен маалымат алышкан.
Кар көчкүсүнө кабылгандардын экөөсү каза болгон. Алар: Жээнбай уулу Мирбек менен Төлөнбаев Адылбек болгон. Кар көчкүдөн аман калган 1986-жылы туулган Шераалы уулу Уланбек Жерге-Тал айылынын тургундарына маалымат жеткирип, жергиликтүү тургундардан 10 адам 19-февралда түнкү саат 02:00 чамасында көчкү түшкөн аймакка издөө иштерин жүргүзгөнгө барышкан. Натыйжада, кечки саат 19:30дар чамасында каза болгондордун сөөктөрү Жерге-Тал айылына алынып келинген.
