ИИМдин маалымат кызматы 10-февралда тараткан маалыматында Кара-Суу районундагы мечиттердин биринин имамы эл арасында диний-экстремисттик уюмдун идеясын жайылтып жана Сирияга кетүүгө үндөп жүргөндүгү үчүн кармалгандыгын билдирген.
ИИМдин 10-башкы башкармалыгы Ош жана Баткен облустары боюнча санкция берилген 22 дарек боюнча тинтүү иштерин жүргүзгөн учурда, аталган шаардагы мечиттердин биринин имамынан экстремисттик адабияттар табылган.
"Кармалгандардын арасында Кара-Суу шаарынын имамы да бар. Ал жаштар арасында диний-экстремисттик уюмдун идеясын жайылтып жана Сирияга кетүүгө үндөп жүргөн. Анын радикалдуу салафизмди тутунгандыгы аныкталды", — деп билдирди ИИМдин маалымат кызматынан.
Бул боюнча Sputnik Ислам таануу боюнча илимий-изилдөө институтунун директору Мамед Мырзабаевдин пикирин сурадык.
"Бул өзгөчө мааниге ээ жана кооптуу. Кармалган имам 2006-жылы атып өлтүрүлгөн Рафик Камаловдун баласы. Мечит да Рафик Камаловдуку, анын баласы имам болуп калган. Ал илгертеден бери эле Кара-Сууда өзүм билемдик кылып, күч органдарын кенебей келген имам. Анын "Хизб-ут-тахрир" экстремисттик уюмунун идеологиясын илгертеден бери эле таратып келгендиги ачык, өзүнүн мечитинде жыйындарды ачыктан ачык эле өткөрүп келген. Мунун тарапташтары көп болгондугу үчүн мамлекет буга чейин эч нерсе кыла албай келген. Мамлекеттин мындай кылуусу тобокелдүү бир кадам болду. Бул токтолуп калбайт, анын тарапташтары тарабынан нааразычылык жаратышы мүмкүн", — деди Мырзабаев.
Биздин маектеш имамдын кармалышын тобокелдүү деп баа берүүсүнүн себебин төмөнкүчө түшүндүрдү.
"Тобокел дегенимдин себеби, мамлекет иштеп турган имамды албаш керек эле. Мамлекет буга баштатан даярданып, мечитти кайрадан каттоодон өткөрүп, башка имамды даярдап туруп, анан кийин алыш керек болучу. Бир жагынан мамлекет да бул имамга болушунча чыдады да, анан акыркы кадамга барды, бирок, бул бир имамды камап коюу менен чечиле турган маселе эмес. Биринчиден, мындай көйгөй башка жерде бар экендигин да билиш керек. Экинчиден, системалуу түрдө муфтият менен мамлекет акырындап имамдарды алмаштыруусу зарыл. Бул маселени имамдардын жаңы муунун тарбиялап чыгуу аркылуу чечиш керек", — деди Мырзабаев.
ИИМдин 10-башкармалыгынын жетекчиси Рафик Мамбеталиев 2006-жылы атып өлтүрүлгөн Рафик Камаловдун баласы экендигин тастыктады.
"Кара-Суу шаарынындагы Аc-Сарахси мечитинин имамы Камалов Рошат Мухамад Рафикович. Ал Рафик Камаловдун баласы", — деп билдирди Рафик Мамбеталиев Sputnik маалымат сайтына.
Эксперт мамлекет менен чогуу иш алып бара турган жаңы муундагы имамдардын зарылдыгын, болбосо, мамлекет оңго тартса, алар солго тартып жаткандыгын кошумчалады.
ИИМдин маалымат кызматы кармалган имам убактылуу кармоо жайына киргизилгенин билдирди.
Рафик (Мухаммадрафик) Камалов 2006-жылы август айында атайын кызматтардын антитеррордук операциясында жок кылынган.
