Башкы прокуратура билдиргендей, министр менен ректор окуу жайга ЖРТда алган упайлары туура келбеген абитуриенттерди кабыл алган деп айыпталууда. Тергөө маалында аныкталгандай, 2013-жылдын сентябрь айында КРСУнун медициналык факультетинин контрактык бөлүмүнө кабыл алынган 24 абитуриент тестирлөөдөн төмөн баа алышкан. Бирок, алган упайларына карабай, алар окуу жайга өтүп кетишкен.
"Бул фактылар КРСУга абитуриенттерди кабыл алууда окуу жайдын жетекчилиги жана билим берүү министрлиги тарабынан олуттуу мыйзам бузуу болгонун тастыктап турат", — деп айтылат Башкы прокуратура тараткан билдирүүдө.
Белгилей кетсек, КРСУга 24 абитуриенттин кабыл алынышы боюнча Жогорку Кеңештеги Билим, илим, маданият жана спорт боюнча комитетинин төрагасы Каныбек Осмоналиевге карата да кылмыш иши козголуп, ал абитуриенттерден 14 миң доллар пара алган деп айыпталууда. Өз кезегинде эл өкүлү ага тагылган айыптар негизсиз экенин айтып, өзүнүн актыгын далилдегенге аракет кыла турганын билдирген.
