БИШКЕК, 16-мар. — Sputnik. Патрулдук милицияга видеорегистраторлорду алуу үчүн 10 миллион сомдой каражат коротконун ИИМдин Жол кайгуул кызматынын жетекчисинин орун басары Ыманалы Саркулов Sputnik Кыргызстан маалымат агенттигине билдирди.
Үстүбүздөгү жылдын 1-апрелинен тарта Жол кайгуул кызматы менен Кайгуул посттук кызматтары бириктирилип, Патрулдук милициянын башкы башкармалыгы түзүлөт. Анын кызматкерлери күнү-түнү иштеп, видеорегистратор менен жабдылат. Ал сегиз саат бою тынымсыз иштегенге жөндөмдүү.
"Жалпысынан 10 миллион сомго 500 видеорегистратор сатып алынган. Анын ичинде сервер, мультимедиалык портал дагы бар", — дейт Жол кайгуул кызматынын жетекчисинин орун басары.
Өз кезегинде коомдук автивист Болот Ибрагимов социалдык тармактагы баракчасына "Жол кайгуул кызматынын мурдагы жетекчилиги милиция кызматкерлеринин төшүнө тагыла турган камераларды бекер алуу боюнча сүйлөшүүгө жетишилгенин" жазды. Ошондой эле, азыр ал асмандаган акчага алынып жатканын сынга алды.
Ал эми Саркулов бекер алынган 25 регистратор автоунааларга орнотулганын айтты.
"Бирок, ал индивидуалдык түрдө колдонууга жараксыз болчу, андан флешканы алып, андагыларды өчүрүп салууга мүмкүн эле. Азыр биз көп ишти аткара алган видеорегистраторлорду алдык. Алар үндү жазып, видеого да тартат. Ошондой эле, фотоаппарат, радиостанция жана GPS-навигатор катары колдонсо болот", — дейт Саркулов.
Ал ошондой эле жабдуунун баасы кымбат эместигин белгилеп, эгер Кытайдан эмес, Россия же Европадан алганда наркы асман чапчымактыгын кошумчалады.
