БИШКЕК, 17-фев. — Sputnik. Электр энергиясына болгон тариф өзгөрбөй турганын Отун-энергетикалык комплексин жөнгө салуу боюнча мамлекеттик агенттиктин башчысы Таалайбек Нурбашев Sputnik Кыргызстан маалымат агенттигине билдирди.
2015-жылдын август айында электр энергиясына болгон тариф 10 пайызга кымбаттаган.
"Эч кандай өзгөрүү болбойт, тариф өзгөрбөйт. Бул оюн эмес да. Анан калса ал жакында эле бекитилбедиби", — деген пикирин Нурбашев айтат.
Бирок, аталган мекеменин статс-катчысы Миргүл Айдарова тарифтер ушул бойдон сакталып калат дегенден алыс.
"Эки жума ичинде жаңы тариф иштелип чыгып, коомдук талкууга коюлат. Жаңы тарифти иштеп чыгууда Токтогул суу сактагычындагы суунун көлөмү, каражаттын тартыштыгы, электр энергиясынын импорту эске алынат", — деди ал.
Айдарова электр энергиясынын баасы кымбаттап же арзандары боюнча түшүндүрмө берген жок.
Былтыр 1 кВт саат электр энергиянын баасын "Электр станцияларында" 78,52 тыйын деп бааланса, ГЭСте иштелип чыккан энергия 16,9 тыйын жана ТЭЦте 3 сом 63,6 тыйынды түзгөн. Эсептөөдө энергияны жеткирүү жана таратууга кеткен чыгымдар эске алынган эмес.
