БИШКЕК, 9-фев. — Sputnik. Айыл чарба тармагы үчүн 100 миң сомго чейинки насыялар күрөөсүз берүү боюнча иштер жүрүп жаткандыгын премьер-министр Темир Сариев насыя берүүнүн жүрүшү боюнча жумушчу жыйында билдирди.
Сариев жарандарды убара кылбастан, насыя берүүнүн шартын жөнөкөйлөштүрүүнүн жол-жобосун карап чыгуу керектигин билдирди.
"Бериле турган насыялар эмгектенип, иштейм деген каалоосу бар жарандарыбыз үчүн түрткү болушу керек. Ким эмгектенүүгө умтулса, өкмөт ар тараптуу колдоого алып, убара тарттырбастан шарттарды түзүүгө даяр болушу зарыл", — деди өкмөт башчы.
Муну менен катар "Айыл Банк" жана "РСК-Банкты" жеңилдетилген насыялар боюнча аймактардагы дыйкандарга жеткиликтүү маалымат жеткирүү үчүн түшүндүрүү иштерин күчөтүүнү тапшырды.
Учурда аталган фонд аркылуу "Айыл Банкка" 1 миллиард 300 миң сомдук, ал эми "РСК-Банкка" 1 миллиард сомдук сунуштар келип түшкөнү белгилүү болду.
