БИШКЕК, 25-дек. — Sputnik. 1-декабрга алынган маалымат боюнча "Тазалык" муниципалдык ишканасы 121 миллион 457 миң сом бересеси менен эң ири карызкорлордун көч башында турарын Мамлекеттик салык кызматы билдирди.
Мамлекеттик салык кызматы ири суммадагы карызы бар ишкана менен мекемелердин тизмесин жарыялады.
Ири карызкор ишканалардын катарында "Бишкек штамп заводу" мамлекеттик ишканасы, "Бишкек машина куруу заводу" ААКысы бар. Алар 43 миллион 458 миң жана 34 миллион 458 миң сом карыз. Ошондой эле, Кара-Көл шаарындагы "Нарынгидроэнергострой" ААКы 29 миллион 778 миң сом салык төлөгөн эмес.
Миллиондогон карызы бар ишкана-мекемелердин саны 30га чамалайт.
Жалпысынан алганда 1-декабрга карата салык төлөбөгөн мекеме-ишканалардын мамлекетке болгон бересеси 405 миллион 813,9 миң сомду түзөт.
