БИШКЕК, 24-дек. — Sputnik. Бүгүн Жогорку Кеңештин депутаттары республикалык бюджетти жактырышты. Өткөн жумада парламент биринчи окууда "Кыргыз Республикасынын 2016-жылга республикалык бюджети жана 2017-2018-жылдарга карата божомолу жөнүндө" мыйзам долбоорун жактырган.
Бүгүн пленардык жыйында депутаттар башкы финансылык документти экинчи жана үчүнчү окууда жактырып, 110 парламентарий макул болсо, үч депутат "каршы" добушун берген.
"2016-жылга карата түзүлгөн бюджет өнөр жайды жана экономиканын реалдуу секторун өнүктүрүүгө багытталган. Муну менен биз өнүгүүгө жол алдык", — деди премьер-министр Темир Сариев.
Анын айтымында, 2010-жылы бюджеттин киреше бөлүгү 33 миллиард сомду түзсө, 2015-жылы бул көрсөткүч 93 миллиардга жеткен. Киреше дээрлик үч эсеге көбөйгөн.
Ал эми 2016-жылга карата түзүлгөн бюджеттин киреше бөлүгү 124,4 миллиард сомду, ал эми чыгашасы 146,4 миллиард сомду түзгөн. Бюджеттин таңсыктыгы эмдиги жылы 22,4 миллиард сомго жетип, ИДПнын 4,5 пайызын түзгөнү белгилүү болду.
