КЕМИН, 29-авг. — Sputnik. "Датка – Кемин" жогорку чыңалуудагы электр линиясынын ишке кириши менен Кыргызстан эми чындап энергетикалык көз карандысыздыкка жетишкенин өлкө президенти Алмазбек Атамбаев бул электр энергиясын ишке киргизүү салтанатында билдирди.
Буга чейин Кыргызстандын түндүгүн электр энергия менен камсыз кылууда коңшу мамлекеттерге көз каранды болуп келген болсо, Атамбаев эми ал кыйынчылыктар жаралбай тургандыгын айтты.
"Эми биз башкаларга жалдырабайбыз. Биз өзүбүздүн гана мамлекетти электр кубаты менен камсыздабастан, коңшу мамлекеттерди да камсыздай алабыз", — деди ал.
"Кемин" көмөк чордонунун кубаты 500 киловольтту түзөт. Ал Кыргызстандын түндүк аймагын толук камсыздамакчы.
Долбоордун жалпы суммасы 390 миллионго жакын долларды түзөт.
