БИШКЕК, 20-авг. — Sputnik. Кыргызстандын Улуттук банкы валюталык өзгөрүүлөргө туруштук берүүгө мүмкүнчүлүгү жетиштүү экенин аталган мекеменин жетекчиси Толкунбек Абдыгулов маалымдады.
Бейшеби күнү Казакстандын премьер-министри Карим Масимов Казакстан теңгенин долларга карата эркин баасына өткөнүн билдирген.
Абдыгуловдун айтымында, казак бийлигинин бул чечиминде эч кандай кооптуулук жок.
"Кыргызстанда 20 жылдан ашуун убакыттан бери эркин курс өкүм сүрөт. Башкача айтканда, курсту суроо менен талап аныктайт. Казакстанда буга чейин кырдаал бир аз башкача болчу. Эми коңшу мамлекет биздикиндей абалга өттү", — деди ал.
Абдыгуловдун айтымында, эл аралык валютада сакталып турган 2 миллиард доллар Кыргызстанда валютанын кескин секирик жасашына жол бербейт.
Кыргызстандын акча алмаштыруу жайлары учурда казак валютасын 32 тыйындан сатып, 20 тыйынга баалап алып жатат.
