БИШКЕК, 19-мар. — Sputnik. Кыргызстандын кургатылган мөмө-жемиштери Москванын базарларында талап кылынып жатканын Экономика министрлигинин алдындагы экспорт саясаты боюнча Кыргызстандын Россиядагы толук ыйгарымдуу өкүлү Улан Мамытов билдирди.
Буга чейин ал Кыргызстандын кургатылган мөмө-жемиштери Москвадагы дүкөндөрдө сатылып баштаарын айткан эле. Биринчи партия менен Баткендин кургатылган 2 тонна өрүгү Россияга жиберилген.
"Москванын дүкөндөрүнө түшкөн кургатылган өрүккө болгон талап өстү. Март айынын аягында 60-70 тонна кургатылган өрүктөрдү Россияга жиберүү маселеси каралып жатат", — деди Мамытов.
Экономика министрлиги Кыргызстандын азык-түлүгүнө болгон суроо-талап Россиянын базарларында өсүп жатканын белгилеп, атамекендик ишкерлерди мөмө-жемиштерди экспорттоого активдүү катышууга чакырат.
