БИШКЕК, 28-мар. — Sputnik. Пакистандын полициясы Лахор шаарында өзүн жардырып жиберген жан кечти сегиз жылдан бери диний окуу жайда сабак берген Юсуф аттуу мугалим экенин Geo TV телеканалына таянуу менен РИА Новости жазып чыкты.
Эскерте кетсек, кечээ, жекшемби күнү Лахор шаарындагы парктын жанында жардыруу болуп, андан 69 адам каза болгон. Полициянын маалыматына ылайык, көз жумгандардын 23ү — балдар болгон. Мындан тышкары, 300дөн ашуун адамдын жарадар болгону айтылууда. Терактынын жоопкерчилигин "Талибан" уюмуна жакын топ өз мойнуна алды.
Маалыматка ылайык, жан кечти 1988-жылы төрөлүп, Пакистандын Пенжаб провинциясындагы Музаффаргарх шаарында жашап келген. Тергөөнүн алдын ала маалыматы боюнча Юсуф Дера Гази Хана шаарында диний билим алып, сегиз жылдан бери диний окуу жайда сабак берип келген.
Полициянын терроризмге каршы департаменти рейд өткөрүп, жардырууга шектүү 15 адамды кармады. Анын ичинде Юсуфтун үч бир тууганы бар экени айтылууда.
