БИШКЕК, 24-дек. — Sputnik. Кыргызстандык ырчы Кайрат Примбердиев Россиянын Биринчи каналы уюштурган "Голос" долбоорунун финалына чыкты.
Эскерте кетсек, долбоор түз эфирде өттү. Биринчи болуп чыккан Примбердиев ырын аткаргандан кийин атаандашы Олег Кондраков өнөрүн тартуулады. Андан соң эрежеге ылайык катышуучулар Николай Носков менен бирге анын "Паранойя" аттуу чыгармасын аткарышты.
Калыстар тобунун пикиринен кийин өнөрпоздорго насаатчы болгон Дима Билан Примбердиев үчүн 60 пайыз добуш берип, ага көрүүчүлөрдүн 58 пайызы кошулду. Натыйжада кыргызстандык ырчы жеңишке жетишип, финалга чыкты.
Кайрат Примбердиев үстүбүздөгү жылдын сентябрь айынан тарта Россиянын Биринчи каналындагы "Голос" долбооруна катышып келет. Октябрь айында өткөн "Беттеш" турунда Примбердиев Дима Биландын колдоосу менен кийинки этапка өткөн.
