БИШКЕК, 13-окт. — Sputnik. Шайырлар жана тапкычтар клубунун быйылкы сезондогу жыйынтыктоочу беттешти 23-декабрда Москвада өтөрү КВНдин эл аралык бирикмесинин сайтына жарыяланды.
Башкы оюн Россия армиясынын борбордук академиялык театрынын имаратында өтөт. Чемпион аталуу үчүн "Азия MIX" менен бирге Мурманск курама командасы, астаналык "Спарта", "Радио Свобода" (Ярославль) жана Москва мамлекеттик циркинин командалары ат салышат.
"Азия MIX" 7-октябрда өткөн экинчи жарым финалдык оюнда мыкты аталып, финалга өткөн. Бул кыргызстандыктарды кубанткан биринчи учур эмес. Аталган команда 2015-жылдын июль айында "Голосящий КиВиН — 2015" сынагында байгеге татыган.
