БИШКЕК, 19-авг. — Sputnik. Көчмөндөр оюнунун алкагында өтүүчү эл аралык айтышка катыша турган акындардын саны сегизден 12ге өзгөртүлдү. Бул тууралуу Маданият, маалымат жана туризм министрлиги билдирди.
II Дүйнөлүк көчмөндөр оюндарынын алкагында уюштурулган Х эл аралык төкмө акындар айтышы Кырчын жайлоосунда өтөт.
"Вице-премьер Гулмира Кудайбердиеванын "Айтыш-2016" сынагын көзөмөлдөө боюнча тапшырмасына ылайык маданият, маалымат жана туризм министринин милдетин аткаруучу Түгөлбай Казаков "Айтыш" коомдук фонду менен биргеликте Х эл аралык төкмө акындар айтышынын тандоо туру өзгөрүлгөнүн билдирет. Элдин пикирин эске алуу менен жогорку упайлардын негизинде тандоо турунан 8 акын эмес, 12 акын тандалып алынды", — деп айтылат маалыматта.
Ошентип 2016-жылдын 4-5-сентябрында өтө турган айтышка сегиз казак акыны, 12 кыргыз акыны катышмай болду.
Тандоо турунан өткөн 12 кыргыз акыны:
- Болот Назаров
- Кадырбек Бейшенов
- Асылбек Маратов
- Чыңгыз Кожошев
- Изат Айдаркулова
- Аалы Туткучев
- Азамат Болгонбаев
- Амантай Кутманалиев
- Жеңишбек Жумакадыр
- Максат Кулуев
- Шекербек Адылов
- Идирис Айтбаев
Дүйнөлүк көчмөндөр оюндары 3-8-сентябрь аралыгында Ысык-Көлдүн жээгинде өтөт. Ага катышууга 35 мамлекет билдирме жөнөттү.
Sputnik Кыргызстан маалымат агенттиги жана радиосу Дүйнөлүк көчмөндөр оюндарынын расмий медиа өнөктөшү болуп саналат.
