БИШКЕК, 8-май — Sputnik. Атактуу бийчи Атай Өмүрзаков өзүнүн "Тумар КР" тобу менен "Британия таланттарды издейт — 2016" (Britain's Got Talent 2016) шоусуна катышып, кийинки турга өттү. Бул тууралуу Sputnik Кыргызстан агенттигине Атай Өмүрзаков билдирди.
Бийчилердин талантына күбө болгон калыстар четинен таң калышып, таланттуу кыргыз жигиттерин бир добуштан кийинки турга өткөрүштү. Ал ортодо бийчилердин номерине күбө болгон англиялыктар ордунан тура калып кол чаап, сүрөөнгө алышты.
Англиянын жергилктүү басылмалары кыргызстандык жигиттердин ийгилигин жазып чыгып, анда калыстардын эмоциясын баяндайт. Ага ылайык, белин бурап бийлеген кыргыз жигиттерине калыстык кылган төрт калыстын бири ордунан так секирип тура калса, экинчиси таң калганын жашырган жок. Ал эми үчүнчү калыстын эки көзү төрт болсо, төртүнчү калыс шатырата кол чапкан.
Атай Өмүрзаков жана "Тумар КР" тобу буга чейин Украина, Чехия жана Россияда өткөн телешоуларга катышып, ийгилик жарата алышкан.
