БИШКЕК, 2-май — Sputnik. Бүгүн "Ак Илбирс" улуттук кино сыйлыгынын уюштуруу комитети "Эң мыкты көрүлгөн тасма" номинациясынын жеңүүчүсү катары "Биртууганчик" тасмасын атады. Бул тууралуу кинематографисттер союзунан билдиришти.
Маалыматта айтылгандай, "Биртууганчик" тасмасы 2015-жылы прокаттан эң көп каражат топтой алган.
Белгилей кетсек, "Ак Илбирс" кино сыйлыгы 2015-жылдан тарта Борбор Азияны камтып келет. Буга чейин 14 номинация боюнча сыйлыктар ыйгарылып келсе, эми "Борбор Азиянын мыкты тасмасы" жана "Дүйнөлүк кинематографияга кошкон салымы үчүн" аттуу эки номинация кошулган.
"Ак Илбирс" кино сыйлыгына 2015-жылы тартылган бардык жанрдагы тасмалар талапкерликтерин көрсөтө алышат.
Сыйлыктарды тапшыруу үстүбүздөгү жылдын 13-майында "Манас" кинотеатрында өткөрүлөт.
