БИШКЕК, 22-дек. — Sputnik. Россиялык ырчы Елена Ваенга Кайрат Примбердиевди Санкт-Петербургда өтө турган концертине чакырды. "Главная сцена" музыкалык телешоусунун финалдык концерти Мамлекеттик Кремль сарайында дүйшөмбү күнү, 21-декабрда өттү. Долбоордун катышуучулары бир сахнада Тамара Гвердцители, Ольга Кормухина, "A`Studio" тобу, Нюша, орус эстрадасынын легендасы Иосиф Кобзон жана башка белгилүү ырчылар менен ырдашты.
Примбердиев аны Ваенга жыл сайын туулган күнүнө карата Санкт-Петербург шаарында өтүүчү концертине ырдап берүүгө чакырганын белдирди.
"Ал мени жеке концертине ырдап бер деп чакырды. Мындай сунуш менен мага кайрылганына абдан кубанычтамын", — деди Примбердиев.
Ырчы "Главная сцена" теледолбоорунун финалдык жыйынтыгы расмий түрдө 31-декабрда жарыялана турганын маалымдады.
"Мен финалдык жыйынтыкка абдан канааттандым, Кыргызстанга чоң чыгармачылык эргүү менен келем. Россиялык композиторлордон бир нече сунуштар түштү", — дейт ырчы.
"Главная сцена" теледолбоору — таланттардын эл аралык шоусунун россиялык версиясы. Конкурсанттар ачык түрдө тандалып алынат. Долбоордун башкы байгеси бүткүл россиялык тур болуп саналат. Биринчи сезондогу телешоунун жеңүүчүсү 24 жаштагы өзбекстандык Сардор Милано болгон.
