БИШКЕК, 20-дек. — Sputnik. Кыргызстандык ырчы Кайрат Примбердиев Россиянын "Главная сцена" телешоусунун финалына өттү. Программа бүгүн кечинде "Россия РТР" телеканалынан көрсөтүлдү.
Анын "Есть только миг" деп аталган ырды аткарганын калыстар тобундагы ырчы ЕленаВаенга чоң канааттануу менен жактырып оң баасын берсе, дагы бир калыс Валерий Леонтьев эмнегедир кылчактап туруп алды. Алып баруучунун демилгеси менен Кайраттын экинчи жолу ырдаган "Куда уходит детство" чыгармасы анын көңүлүнө төп келип, бул сапар "ооба" дегенге аргасыз болду. Ал эми Диана Арбенина менен Владимир Пресняков жана композитор Александр Зацепин сөз жок жактырып, колдошту.
Ошентип, кыргызстандык Кайрат Примбердиев баштаган жети ырчы Алена Петровская (Санкт-Петербург ш.), Илья Григорьев (Назарово ш.), Июлина Попова (Якутск), Анна Салеева (Саратов ш.), Арсений Бородин (Барнаул ш.) жана "Рекорд Оркестр"(Владимир ш.) тобу эми Кремлде күч сынашат.
Мындан туптуура бир жума мурда Кайрат Примбердиев "Главная сцена" телешоусунун жарым финалына өткөн эле.
Кийинки концерт эми 21-декабрда Москва шаарындагы Кремль сарайында өтөт.
