БИШКЕК, 8-дек. — Sputnik. Кыргызстандын президенти Алмазбек Атамбаев белгилүү ырчы Мыскал Өмүрканованын 100 жылдык мааракесине куттуктоо жолдоду. Бул тууралуу мамлекет башчынын маалымат кызматы билдирди.
Өлкө башчынын куттуктоосунда кылымдарды карыткан кыргыздын тарыхы, салт-санаасы, маданияты элдик оозеки чыгармачылык жана ырлар аркылуу муундан муунга берилип келгени айтылат.
"Элдик ырлар тууралуу кеп болгондо кыргыз эли биринчи кезекте уккулуктуу мукам үндүү Мыскал Өмүрканованы эстейт. Мыскал Өмүрканова аткаруучулук чеберчилиги, жараткан тартуулаган жагымдуу үнү аркылуу бүтүндөй бир муундун сүйүктүү ырчысы катары таанылып, жалпы элибиздин сыймыгына айланды", — деп айтылат өлкө башчынын куттуктоосунда.
Таланттуу ырчы өзү дагы комузда кол ойнотуп, "Ак бермет", "Жүрөгүмдөн", "Колхоздогу курбума" жана "Колхозчунун күйгөнү" сыяктуу ырларды жараткан.
Мыскал Өмүрканова кыргыз ССР Жогорку Советинин депутаты, Ленин, эки ирет Эмгек Кызыл Туу ордендери, медалдар менен сыйланган.
