Кыска метраждуу тасмалардын фестивалына казакстандык режиссер калыс болот

БИШКЕК, 16-ноя. — Sputnik. Үстүбүздөгү жылдын 12-15-декабрь күндөрү өтө турган V Эл аралык "Кыргызстан — кыска метраждуу тасмалардын өлкөсү" кинофестивалына казакстандык кинорежиссер, продюсер Сергей Азимов калыс катары катышуу үчүн макулдугун бергенин "Айтыш-фильм" студиясы билдирди.

Маалыматка ылайык, Азимов Алматыда өтүп келген "Бастау" Эл аралык кинофестивалынын башкы директору болуп эсептелет. 

Кыргызстанда өтө турган эл аралык иш-чарадагы тасмаларга фестивалга катышкан өлкөлөрдүн киноискусство жаатындагы төбөсү көрүнгөн беш ишмер баалайт. Студия учурда улуттук жана эл аралык деп бөлүнгөн конкурстук программада тартуулана турган тасмаларды сынай турган эксперттик коллегияны түзүү боюнча иш алып барууда. 

Эки программада тең фильмдерге "Мыкты тасма", "Мыкты режиссура", "Калыстар тобунун атайын байгеси", "Көрөрмандардын байгеси" сыяктуу төрт номинация боюнча баа берилет. 

"Айтыш-фильм" калыстар тобунун акыркы тизмеси жакын арада даяр болорун кошумчалады.

Эл аралык кинофестивалга КМШ, Балтика мамлекеттери менен Грузиядан тышкары Иран, Сирия, Египет, Польша, АКШ мамлекеттери да катышуу каалоосун билдирген.