БИШКЕК, 31-окт. — Sputnik. Белгилүү комузчу Самара Токтакунованы президент Алмазбек Атамбаев 70 жылдык мааракеси менен куттуктады.
"Кыргыз кыйырында сизди билбеген, чеберчилик менен аткарылган күүлөрүңүздү укпаган адам аз чыгаар. Сиз элибиздин улуттук музыкалык аспабынын даңкын ааламга чыгарган мыкты аткаруучу катары элдин сүймөнчүлүгүнө ээ болдуңуз", — деп айтылат куттуктоодо.
Өлкө башчысы ошондой эле, Токтакунованын талантына дүйнөнүн айтылуу театрларында Азиянын, Африканын, Европанын жана Америка континенттеринин элдери тамшанып, жогору баа беришкендигин белгилеген.
"Сиз талыкпаган эмгегиңиз, табигат тартуулаган талантыңыз менен улуттук музыка өнөрүн бийик деңгээлге көтөрүүгө чоң салым коштуңуз. Кылымдарды карыткан кыргыз элинин үмүтүн жана тилегин үч кыл комуз аркылуу дүйнө элдеринин сезимине жеткире алдыңыз", — деп айтылат президенттин куттуктоосунда.
Токтакунова III даражадагы "Манас орденин", "Даңк" медалы менен сыйланган. Андан сырткары, СССРдин эл артисти, Кыргыз эл артисти, Токтогул атындагы мамлекеттик сыйлыктын ээси.
