БИШКЕК, 20-окт. — Sputnik. Бешинчи ирет өтүп жаткан Эл аралык "Арт-Ордо" театр фестивалы Токтоболот Абдымомунов атындагы Кыргыз улуттук драма театрында "Картаң айымдын келиши" жана "Кыз Сайкал" аттуу спектаклдер менен башталды.
Салтанаттуу ачылыш аземине вице-премьер Дамира Ниязалиева, маданият, маалымат жана туризм министри Алтынбек Максутов катышты. Кароо сынакка Казакстан, Өзбекстан, Тажикстан, Татарстандан келген театр жамааттары кызыл килемден басып, сахнага өтүштү.
Тартуулана турган спектаклдерди Мухтар Ауэзов атындагы Казак мамлекеттик академиялык театрынын көркөм жетекчиси, СССРдин эл артисти, Асаналы Ашимов башында турган калыстар тобу бааламакчы.
Фестивалдын бүгүнкү программасында эл назарына Казак мамлекеттик академиялык театрынын "Кас кагым", Арсен Умуралиев атындагы шаардык театрдын "Принцесса Турандот", Султан Ибраимов атындагы Ош улуттук драма театрынын "Дели бийи" жана Түндүк Казакстан театрынын "Ревизор" спектаклдери коюлат.
Кароо-сынак 23-октябрга чейин уланат.
