БИШКЕК, 9-окт. — Sputnik. Жаш режиссер Мирлан Абдыкалыковдун "Сүтак" тасмасы "Мыкты чет элдик фильм" номинациясы боюнча "Оскар" сыйлыгына көрсөтүлгөнүн Кыргызстандын Кинематография департаменти билдирди.
Маалыматка ылайык, абройлуу сыйлыкка талапкерлердин тизмесине жалпы жонунан 81 тасма киргизилген.
"Быйыл тизмеге биринчи ирет Парагвайдын кинокартинасы кошулду. Кыргызстандан Мирлан Абдыкалыковдун "Сүтак" тасмасы кирди. Талапкерлердин тизмеси 2016-жылдын 14-январында бекитилет", — деп айтылат билдирүүдө.
"Сүтактын" соңку ийгилиги сентябрдын аягында Казакстанда өткөн XI эл аралык "Евразия" кинофестивалындагы баш байгени алышы болду.
"Сүтак" – адамдардын ортосундагы таза мамилелер, аруу сезимдер, ыйык каада-салт тууралуу тасма. "Айтыш-фильм" тарабынан "Ой Арт" студиясы менен биргеликте тартылган тасма бир катар эл аралык кинофестивалдардын баш байгесин багындырган.
