БИШКЕК, 5-сен. — Sputnik. Премьер-министр Темир Сариев Бишкек шаарындагы Дүйнө Эпосторунyн III фестивалын эпос жаратып, муундан-муунга өткөрүп келген элдердин башын бириктерген окуя деп атады.
Ал кыргыз эли үчүн "Манас" баштаган эпостор жөн гана адабий чыгарма же элдик оозеки чыгармачылыктын бир түрү эмес, улуу жазуучубуз Чыңгыз Айтматов атагандай, "рухубуздун туу чокусу" экендигин айтты.
"Элибиз өз тарыхын, өз тагдырын, салт-санаасын эпостор аркылуу айтып келген. Кыйын учурда кайгысын мына ушул чыгармаларга катып, андан азык алса, бакубат турмушта болгон жетишкендигин, кубанычын эпостор аркылуу атадан-балага, муундан-муунга айтып берген. Ошондуктан, улуттук маданияттын үлгүсү эпосторду сактоо жана өнүктүрүү, биздин негизги милдетибиз", – деп билдирди премьер-министр.
Дүйнө эпосторунун III фестивалы 3-сентябрдан тарта Бишкекте өтүп жатат. Ал 7-сентөябрга чейин уланат.
Анын максаты — чыгармачылыктын кайталангыс түрүн сактоо жана өнүктүрүү, эл аралык руханий, маданий шериктештикти кеңейтүү аркылуу улуттун өзүн-өзү таанусун бекемдөө. Фестиваль алкагында илимий симпозиум, көргөзмөлөр өтүп жатат.
