БИШКЕК, 4-сен. — Sputnik. Россиянын Анапа шаарында XXIV "Киношок – 2015" ачык фестивалына Садык Шер-Нияздын "Курманжан датка" жана Мирлан Абдыкалыковдун "Сүтак" тасмалары катыша турганын Кинематография департаменти билдирет.
Маалыматка ылайык, фестиваль үстүбүздөгү жылдын 13-сентябрында башталып, өз ишин 20-сентябрда жыйынтыктайт. КМШ, Латвия, Литва жана Эстония мамлекеттеринин катышуусу менен өтө турган иш-чара Белоруссиялык режиссер "Мы, братья…" аттуу тасмасынын дүйнөлүк премьерасы менен башталат.
Ири маданий иш-чаранын алкагында беш сынак өтөт. Кыргызстандан бара турган "Сүтак" өзүнөн башка тогуз мамлекеттин тасмалары менен толук метраждуу фильмдердин сынагында ат салышат. Ал эми "Курманжан датка" буга чейин популярдуулукка ээ болгон тасмалар көрсөтүлө турган фестивалдын "Аянттагы кино" бөлүгүндө көрсөтүлөт.
Эл аралык фестивалга бул жылы салтка айлангандай, Россия, КМШ жана Балтия мамлекеттеринин киножылдыздары режиссерлор, продюсерлер, сценаристтер, операторлор, сынчылардын келиши күтүлүүдө.
