БИШКЕК, 23-июль — Sputnik. Эстрада аткаруучуларынын эл аралык "Мейкин Азия" фестивалын кыргызстандык Адилет Азимов ача турганын Маданият, маалымат жана туризм министринин өкүлү Ринат Мурзаев билдирди.
Анын айтымында, бүгүн эртең менен фестивалда ат салышуу үчүн келген чет элдик 20 аткаруучу менен бирге кыргызстандык төрт ырчы чүчү кулак кармап, натыйжада Адилет Азимов биринчи номурду сууруп чыккан.
Азимов июндун башында Хакасия жергесинде өткөн улуттук ырлардын IV эл аралык "От ыры – 2015" конкурсунун баш байгесин жеңип алган.
Фестивалга Кыргызстандын атынан Азимовдон тышкары, Руслан Асанкан уулу, Ак-Мөөр Болотбек кызы жана Аксай Муканбет уулу катышат.
Бүгүн кечки саат сегизде эстрада аткаруучуларынын эл аралык "Мейкин Азия" фестивалынын расмий ачылышы болот. Ысык-Көлдүн "Рух Ордо" комплексинде өтүп жаткан бул маданий иш-чара 25-июлда аяктайт.
