БИШКЕК, 20-июль — Sputnik. Үстүбүздөгү жылдын 23-25-июлунда өтө турган эл аралык "Мейкин Азия" фестивалына 20 өлкөнүн ырчылары катыша турганын Маданият, маалымат жана туризм министрлигинин алдындагы Улуттук маданият борборунун жетекчиси Рыскул Боромбаев билдирди.
Боромбаевдин айтымында, фестивалга катышуу үчүн Азербайжан, Армения, Бахрейн, Башкортостан, Белоруссия, Болгария, Казакстан, Крым, Македония, Молдова, Россия, Румыния, Тажикистан, Татарстан, Түркмөнстан, Түркия, Украина, Хакасия жана Түштүк Корея өлкөлөрүнүн эстрада ырчылары келет.
Фестивалга Кыргызстандын атынан Руслан Асанкан уулу, Адилет Азимов, Ак Мөөр Болотбек кызы, Жийдеш Идирисова жана Аксай Муканбет уулу катышат.
Иш-чара үч күнгө бөлүнгөн:
- 23-июль күнү саат 20.00 — фестивалдын расмий ачылышы;
- 24-июль күнү саат 20.00 — фестивалдын экинчи сынак күнү;
- 25-июль күнү саат 20.00 — жеңүүчүлөргө байге тапшыруу салтанаты, коноктор менен лауреаттардын гала-концерти.
Фестивалга 17ден 35 жашка чейинки аткаруучулар катыша алат. Талапка ылайык, алар өз эне тилинде жана дагы бир чет тилинде эки чыгарма аткарат.
Иш-чарага ардактуу конок катары Румыниянын Deepside Dееjays музыкалык тобу жана даниялык ырчы Томас Н’эвергриндин келиши күтүлүүдө.
"Мейкин Азияга" билеттер Улуттук филармониянын жана "Рух-Ордо" маданий борборунун кассаларында сатылууда.
