БИШКЕК, 30-дек — Sputnik. ЖКнын Билим берүү, илим, маданият жана спорт боюнча комитети СССРдин эл артисти, КР Токтогул атындагы мамлекеттик сыйлыгынын лауреаты Болот Миңжылкиевдин элесин дагы бир ирет түбөлүккө калтыруу туурасындагы маселени карады.
Депутат Каныбек Осмоналиевдин айтымында, дүйнөлүк опера искусствосуна жана кыргыз маданиятына зор салым кошкон Болот Миңжылкиевдин эстелиги РФтин Санкт-Петербург шаарындагы Мариин театрына орнотулмакчы. Ырчы өмүрүнүн акыркы күндөрүндө аталган театрда солист болуп иштеген.
Комитетте демилге жактырылып, ЖКнын кароосуна сунуштоо чечими кабыл алынды.
2015-жылы Болот Миңжылкиевдин туулган күнүнө 75 жыл болот. Болот Миңжылкиев көптөгөн өлкөлөрдүн театр сахналарында кайталангыс жагымдуу үнү менен миллиондогон угуучулардын алкоосуна арзыган. СССРдин жана Кыргыз ССРинин эл артисти, бир нече орден, медалдардын ээси. Кыргыз ССР Жогорку Советиин депутаты болуп шайланган.
