БИШКЕК, 5-дек. — Sputnik. Өзбекстандагы президенттик шайлоодо президенттин милдетин аткарып жаткан Шавкат Мирзиёев утуп, 15 миллион 900 миң шайлоочунун добушун алды. Бул жалпы шайлоочунун 88,61 пайызын түзөрүн маалымат жыйында Өзбекстандын Борбордук шайлоо комиссиясынын башчысы Мирза-Улугбек Абдусаламов билдирди.
Бул шайлоодо Либерал-демократиялык партиясы учурда Өзбекстандын президентинин милдетин аткарып жаткан премьер-министр Шавкат Мирзиёевди, Улуттук-демократиялык "Миллий тикланиш" ("Улуттук жаралуу") Сарвар Отамурадовду, социалдык-демократиялык "Адолат" ("Адилет") Наримон Умаровду жана Өзбекстандын элдик демократиялык партиясы Хотамжан Кетмоновдун талапкерлигин сунуштаган.
Эске сала кетсек, буга чейинки президент Ислам Каримов 78 жашында көз жумуп, такты бош калган. Ал эми өлкө башчылыктын милдети убактылуу Шавкат Мирзиёевге жүктөлгөн. Өзбекстандын Борбордук шайлоо комиссиясынын маалыматы боюнча, өлкөдө 9381 участка даярдалган.
