БИШКЕК, 23-ноя. — Sputnik. Өзбекстандын биринчи президенти Ислам Каримовдун улуу кызы Гүлнара Каримова тирүү экенин РИА Новости Каримовдордун үй-бүлөсүнө жакын адамга таянып билдирди.
Мурда бир катар ЖМК өкүлдөрү Өзбекстандын атайын кызматтарына таянып, Гүлнара Каримова 5-ноябрда ууландыруудан каза болгонун, ошол эле күнү Ташкенттеги "Минор" мүрзөсүнө коюлганын билдиришкен.
"Гүлнара Каримованын өлгөндүгү тууралуу маалымат жалган, ал тирүү", — деп жазылат билдирүүдө.
Агенттиктин маектеши Каримованын учурда кайда экендиги тууралуу толук маалымат берүүдөн баш тартты.
Өзбекстандын биринчи президенти Ислам Каримов Ушул жылдын 2-сентябрында 78 жаш курагында дүйнө салып, учурда президенттин милдетин Шавкат Мирзиеев аткарып жатат.
