БИШКЕК, 21-июл. – Sputnik. Кудалар чатакташып, иш сотко чейин жеткен. Атырау облусунун соту септи кайтарып берүү боюнча ишти караган. Бул маалыматты Махамбет райондук сотунунан билдиришкенин Новости-Казакстан маалымат агенттиги билдирди.
Калың талаш Махамбет райондук сотунда каралган. Кыз менен жигит жарандык никеде жашап, бирок, мамилесин расмийлештирген эмес. Бир канча убакыттан кийин кайнене менен келиндин оту күйүшпөй, кыз төркүнүнө баса берген. Кыздын атасы сотко доо менен кайрылып, кудаларынан берген септи кайтарып беришин талап кылган.
Кыздын энеси берген себин кайрып алууну каалаган. Келиндин кайненеси септи жеткирип берип, бирок, эки гүл салгыч вазаны өзүнө калтырып коюп, чатак ырбаган. Араздашкан берки кудагый аларды да кайтарып алуу максатында баасын жазып алып сотко барган. Териштире келгенде алардын наркы 4 миң 730 сом (24 миң теңге) турары маалым болгон.
Сотто эки тарап мунасага келип, болбой калган кудагыйлардын бири гүл салгычтарды кайтарып берип, экинчиси доо арызынан баш тарткан.
