БИШКЕК, 31-мар — Sputnik. Алдын ала маалыматтар боюнча Ислам Каримов үчүн шайлоочулардын 90,39 пайызы өз добушун берген деп билдирет РИА Новости Өзбекстандын 12news.uz жаңылыктар сайтына таянуу менен.
2007-жылы өткөн мурдагы шайлоодо Каримов өзүнүн саясатын колдогон жарандардын 90,76 пайыз добушун алып, эң жакынкы атаандашынан 87 пайызга озуп чыккан. Ал эми 2000-жылкы добуш берүүдө Каримовду шайлоочулардын 91,9 пайызы колдогон.
Өзбекстандын Борбордук шайлоо комитетинин төрагасы "бул жолу партиялар ортосундагы атаандаштык өсүп бара жатканы байкалгандыгын", ал эми "добуш берүү өзү жаңы социалдык-экономикалык шартта өткөндүгүн" белгиледи.
Шайлоонун расмий жыйынтыктарын Борбордук шайлоо комитети добуш берүүдөн кийин он күн ичинде жарыялашы зарыл. Шайлоонун жеңүүчүсү жыйынтык жарыялангандан кийин эки айдан кеч эмес мөөнөттө өз милдетин аткарууга киришет.
