БИШКЕК, 26-янв — Sputnik. Кыргызстан Тажикстан менен биргеликте чек арадагы талаштуу 58 жерди талкууламакчы деп билдирди вице-премьер-министр Абдырахман Маматалиев маалымат жыйынында.
Анын айтымында, аталган комиссия Делимитация жана демаркация боюнча республиканын 1922- жана 1950-жылдардагы картасы боюнча узактан бери иш алып барып келет.
"Россиялык мамлекеттик архивдер бизге толук түрдө иштегенге мүмкүнчүлүк берген жок. Биз суткасына төрт сааттан гана иштедик. Тажикстандык кесиптештерибиз да ушундай эле абалда, аларга да өзүнчө иштөөгө мүмкүнчүлүк беришпептир. Иш ордунан тезирээк жылышы үчүн биргелешип иштөөгө сунуш киргизишти. Учурда биз да өзүбүздүн сунуштарыбызды бердик, карап жатышат", — деди вице-премьер.
Маматалиев иш картага байланбастан, жагдайга жараша жасалаарын айтты.
"Ал жакта биздин атуулдар жашайт, биздин максат – чек арада чыр-чатактарды болтурбоо. Алмашууга боло турган аймактар бар, бирок, көп жерлеринде эки мамлекеттин тең атуулдары жашайт", — деп кошумчалады ал.
