УБ өкүлү Керимбеков: 200, 500 жана 1 000 сомдук жаңы банкноттор пайдаланылат
Жаңы жылдан тартып Кыргызстанда улуттук валютанын IV сериясындагы өркүндөтүлгөн 200, 500 жана 1 000 сом номиналындагы банкноттор жүгүртүүгө чыгат. Бул тууралуу Sputnik Кыргызстан агенттигине Улуттук банктын коомчулук менен байланыш бөлүмүнүн кызматкери Чыңгыз Керимбеков билдирди.
IV сериядагы жакшыртылган банкноттор мурда чыгарылган банкноттор менен жүгүртүүдө чогуу эле жүрө берет.
"Биринчиден, өзгөртүлгөн банкнотто портрет классикалык ыкма менен даярдалып, даана көрүнүп турат. Экинчиден, жарыкка салып караганда "сом" деген сөз окулат", — деп айтты Керимбеков.
Мындан сырткары, жүгүртүүгө чыгарылган банкноттордо 2016 деген сөздү да байкоого болот деп кошумчалады Улуттук Банктын өкүлү.
