"Кыргызстан — кыска метраждуу тасмалар өлкөсү" аталышындагы кинофестивалдын жалпы байге фонду 400 миң сомду түзөт. Бул тууралуу Sputnik Кыргызстан агенттигинин мультимедиалык маалымат борборунда өткөн маалымат жыйында КР Кинематографисттер союзунун төрагасы Таалайбек Кулмендеев билдирди.
Анын айтымында, быйыл жылдагыга салыштырмалуу фестивалга катышуу үчүн көп мамлекеттен билдирме келип түшкөн.
"КМШ өлкөлөрүнүн өкүлдөрү катышкан эл аралык фестиваль быйыл алтынчы жолу өткөрүлүп жатат. Бир жылдын ичинде эл аралык сынакка 200 гө чукул тасма келип түштү. Анын ичинен тандалып отуруп эл аралык сынакка 14 тасма, ал эми улуттук сынакка 12 тасма көрүүчүлөрдүн назарына коюлат. Жалпы байге фонду 400 миң сомду түзөт", — деди Кулмендеев.
Фестивалда мындан сырткары жаш киночулардын "Карек"фестивалынын үч жеңүүчүсү да ат салышат.
