БИШКЕК, 31-авг. — Sputnik. Кыргызстан бүгүн өзүнүн эгемендүүлүк майрамын белгилеп жатат. Мындан 25 жыл мурун Кыргыз Республикасы 31-августта көз карандысыз өлкө экендигин жар салган.
Бул өзгөчө майрам бүтүндөй өлкө боюнча белгиленип, райондун, облустун борборлорунда параддар өттү.
Борбор калаада 1500дөн ашуун аскер параддан өтсө, аларды 80ден ашуун атайын техника коштоду.
Ал эми кыргыз журтун өлкө башчы Алмазбек Атамбаев майрамы менен куттуктады.
Экинчи борбор аталган Ош шаарында да майрам шаңдуу өтүп, жергиликтүү тургундар атайын парадга күбө болушту. Аскердик парад майрамдык концерт, ар кыл оюн-зооктор менен коштолду.
Нарында майрамдын шаңын параддан өткөн күлүктөр ачты. Ал эми парадга аскер техникалары жана жоокерлер катышты.
Баткен облусу да четте калбай аскердик парад жана майрамдык концерт уюштурду.
Караколдо бир гана аскерлер эмес, жаштар өкүлдөрү, ырчылар жана активист студенттер параддан өтүштү.
Ала-Букада жети облустан келечекте баш кошо турган жети келип, түндүк көтөрүштү.
Кара-Балта шаарынын эмгекчилери "Ура" деген кыйкырык менен борбордук көчөдөн өтүштү. Майрам шоу-концерт менен уланууда.
Чаткалда майрамдын көркүн спорттук иш-чаралар ачып, жеңүүчүлөр баалуу белектер менен сыйланды.
Балыкчы шаарында жаш бийчилер жаркын маанай тартуулап, элдин көңүлүн көтөрүштү.
Талас жергесинин тургундары улуттук кийимдерди кийүү менен параддан өтүп майрамды өзгөчө белгилешти.
