БИШКЕК, 27-июн. — Sputnik. Кечээги күндөн бери Кыргызстанда жүзгө чукул жер титирөө катталды. Алардын ичинен кубаты 7 баллга чейин жеткени 10 жолу кайталанса, калганын атайын прибор менен гана байкоого болот. Бул боюнча Улуттук илимдер академиясынын Сейсмология институтунун директору Канат Абдрахматов Sputnik Кыргызстан маалымат агенттигине айтып берди.
Буга чейин Өзгөчө кырдаалдар министрлиги Кыргызстанда бир сутка ичинде жети ирет жер титирегенин, акыркысы бүгүн саат 8.32де катталганын билдирген.
"Кечээтен бери болуп жаткан майда жер титирөөлөрдүн саны 100дөн ашып кетти. Бирок буларды карапайым кишилер сезбейт, аны атайын приборлордун жардамы менен каттап жатабыз. Булардын кооптуулугу эң эле төмөн, анын эч кимге деле зыяны жок. Ал эми катуураак жер 10 ирет силкинип, алардын күчү 2-3 баллдан тарта 6-7ге жетти", — деди Абдрахматов.
Ал майда жер силкинүүлөрү болуп турганы ири зилзаланын чыңалуусун таратып тургандыгын кошумчалады.
"Эгерде 1-2 айдын арасында катуу жер титирөө болсо, ал Кытайдын же Тажикстандын аймагында болушу мүмкүн деп божомолдоп жатабыз. Себеби, сейсмикалык процесстин өзүнүн дареги болот, ошол багыт менен уланса, бул силкинүүлөр аталган өлкөлөрдүн дарегине ооп бара жатат десек болот", — деди ал.
Башкы сейсмолог өлкөдө быйыл зилзала кооптуулугу жоктугун, ал эми келерки жылы сейсмикалык активдүүлүк күчөрүн айтты.
"2016-жылы Кыргызстандын аймагы тынч эле болот, ал эми 2017-2018-жылда сейсмикалык активдүүлүк күчөйт деп божомолдоп жатабыз. Кошумча маалыматтар пайда болсо, кабар беребиз", — деди Абдрахматов.
Маалыматка ылайык, силкинүүлөр кечки саат 5.17ден Алай районунун Бор-Дөбө, Нура айылдарында 3-4,5 балл, Ош облусунда 4-6, Баткенде 3-5 баллдык болуп сезилген.
Эмне үчүн жер титирөөлөр болорун Sputnik инфографикасынан окуңуз>>
