БИШКЕК, 16-май — Sputnik. КСДП фракциясынын депутаты Дастан Бекешов үч майрамды жоюп салуу мыйзам долбоорун коомдук талкууга алып чыкты.
Мыйзам долбоордун маалым-кат негиздемесинде Кыргызстанда 13 майрамдык дем алыш күн болсо, анын айрымы өз маанисин жоготуп койгону айтылат.
"Ата мекенди коргоочулар күнү (23-февраль) бардык эркектердин майрамына айланып калды. Чындыгында өлкөдө жыл сайын 29-майда Куралдуу күчтөр күнү майрамдалышы керек. Конституция бир нече жолу өзгөрүүгө дуушар болгонуна байланыштуу эл 5-майды майрам катары эсептебей калган. Кыргызстан постсоветтик өлкөлөрдүн арасынан 7-ноябрь сайын Улуу Октябрь социалисттик революциясын майрамдаган жалгыз өлкө болуп эсептелет. Мындан улам жаштар бул датанын баалуулугун билбей калышты. Үй-бүлөлөрдө дагы майрамдалбай калган", — деп айтылат мыйзам долбоордо.
Мындан сырткары, мыйзам долбоорунда энелер күнү (май айынын үчүнчү базарында майрамдалат) менен балдарды коргоо (1-июнь) күнүн дем алыш күн катары кабыл алуу сунушу айтылат.
Депутат билдиргендей, бул күндөрдү дем алыш кылуу энелер менен балдарга толук көңүл бурууга шарт түзөт.
