БИШКЕК, 11-май — Sputnik. Кыргызстандын көпчүлүк аймактарында жааган жамгырдын көлөмү май айына белгиленген нормадан ашты. Бул тууралуу Кыргызгидромет Sputnik Кыргызстан маалымат агенттигине билдирди.
Ага ылайык, Бишкек шаарына май айы үчүн белгиленген норма 62 миллиметр болсо, ай башынан бери жааган жамгырдын деңгээли 67 миллиметрге жетип, нормадан 108 пайызга ашкан.
Ошондой эле Жалал-Абад, Ош, Баткен облустарында жааган жамгыр нормадан ашкан.
"Май айында жааган жаан Жалал-Абад облусунда нормадан 119 пайызга ашты. Бул көрсөткүч Баткенде 126 пайызга жетти", — деп Кыргызгидрометтен маалымдашты.
Кыргызгидромет ар бир облустун географиялык өзгөчөлүгүнө жараша бир айлык жаандын нормасы түрдүүчө белгиленгенин кошумчалады.
Белгилей кетсек, катуу жааган жамгырдан улам Жалал-Абад, Ош жана Талас облустарында сел жүрүп, дарыялар нугунан чыгууда.
