Кыргызстанда жергиликтүү кеңештерге шайлоолор башталды

БИШКЕК, 27-мар. — Sputnik. Кыргызстанда жергиликтүү кеңештерге шайлоолор башталды деп билдирди Борбордук шайлоо комиссиясынын маалымат кызматы. 

Республика боюнча шайлоо алты шаарда жана 22 айыл аймактарда өтөт. Алар

Ош, Каракол, Балыкчы, Токмок, Кемин, Майлуу-Суу калаалары жана бир нече айыл аймактары.

"Шайлоо өнөктүгү бүгүн саат 8:00дө башталып, 20:00дө аяктайт", — деп кабарлады БШКнын маалымат кызматынан. 

Бул шайлоого катышып, добуш берүүгө кыргызстандык 265 миңден ашуун адамдын укугу бар. Алардын көбү Ош шаарында турат, 116 миң шайлоочу катталган. Буга ата мекендик 400дөн ашык байкоочу көз салат жана  850 оператор иштейт.

Өнөктүк 199 шайлоо участогунда өтөт. Алардын жарымынан көбү Ош, Каракол жана Токмок шаарларына туура келет. Ошто — 73, Караколдо — 24 жана Токмокто — 20 шайлоо участоктору бар.

Жергиликтүү кеңештерге болуучу шайлоолордо биринчи ирет шайлоочулардын биометрикалык маалыматтарын колдонуу технологиясы аркылуу менен добуш берилет.

Жергиликтүү кеңештерге шайланган депутаттар жергиликтүү бийлик өкүлдөрүн шайлашат.