БИШКЕК, 11-мар. — Sputnik. 1-апрелден тарта Бишкек шаарында, Чүй жана Ысык-Көл облусунда Жол кайгуул кызматынын ордуна Кайгуул милициясынын башкармалыгы иштеп баштайт. Бул тууралуу өкмөттүн сайтында жарыяланган токтомдо айтылат.
3-мартта премьер-министр Темир Сариев укук коргоо органдарын реформалоо боюнча Жол кайгуул кызматы менен Кайгуул күзөт кызматын бириктирүү тууралуу буйрукка кол койгон.
Өкмөттүн сайтындагы токтомдо жаңы түзүлгөн Кайгуул милициясынын башкы башкармалыгы Ош, Баткен, Жалал-Абад, Нарын жана Талас облустарында 2016-жылдын 1-июлунан тарта иштеп баштары белгиленген. Ошондой эле, алгач жаңы түзүмдө мурдагы кызматкерлер иштеп турат.
"Кайгуул милициясынын башкы башкармалыгынын биринчи кызматкерлери Жол кайгуул кызматы менен Кайгуул күзөт кызматынын өкүлдөрүнөн куралат", — деп айтылат токтомдо.
Кайгуул милициясынын башкы башкармалыгына жаңы кызматкерлерди тандоо 2016-жылы 1-октябрда бир гана конкурстук негизде жүргүзүлөт.
Аталган токтомду иш жүзүнө ашыруу милдети КР өкмөт аппаратынын коргонуу, укук тартиби жана өзгөчө кырдаалдар боюнча бөлүмүнө жүктөлдү.
