БИШКЕК, 26-фев. — Sputnik. Март айынын экинчи жарымында Чүй менен Талас облустарында күн суукташы мүмкүндүгүн Кыргызгидромет билдирди.
Маалыматка ылайык, март айында Кыргызстандын аймагында абанын температурасы климаттык нормада сакталат.
Айдын биринчи жарымында Чүй жана Талас облустарында түнкүсүн 5 градуска чейин суук болсо, күндүз 8 градуска чейин жылуу болот. Ош, Жалал-Абад жана Баткен облустарынын дыйканчылык аймактарында түндө 5 градуска чейин суук болсо, күндүз 13 градуска чейин жылуу болушу күтүлөт. Ал эми Ысык-Көл облусунда түндө 9 градуска чейин суук болуп, күндүз күн 5 градуска чейин жылыйт.
Айдын экинчи жарымында өлкөнүн түштүгүндөгү дыйканчылык аймактарда күндүз күн 24 градуска чейин ысыйт. Ал эми Чүй, Талас облустарында аба ырайы өзгөрүп түнкүсүн суук болот. Бул аймактарда күндүз 18 градуска чейин ысыса, түнкүсүн 5 градуска чейин суук болуп, үшүк жүрүшү ыктымал. Ушундай эле суук Ысык-Көл облусунда сакталат.
Нарын облусунда март айы климаттык нормадан төмөн болуп, салыштырмалуу 2…4 градус суук болот. Күндүз 7…12 градус жылуу болсо, түнкүсүн 18…23 градуска чейин суук болот.
