БИШКЕК, 4-фев. — Sputnik. Бүгүн Жогорку Кеңештин депутаттары оң рулдуу унааларга айып пул салууну 2020-жылга чейин узартуу боюнча добуш беришти.
Эскерте кетсек, Кыргызстандын аймагында жүргөн оң рулдуу унааларга айып пул киргизүү мыйзамы 2016-жылдын 1-январынан тартып күчүнө кирмек.
Айып пул чегерүү мөөнөтүн узартуу каралган мыйзам долбоордун демилгечилеринин бири Иса Өмүркуловдун айтымында, айып пул төлөөнүн так механизмдери иштелип чыккан эмес.
"Туугандарын ташып жатабы, же такси кызматын көрсөтүп жатабы — аныктоо мүмкүн эмес. Жүк ташуучу же шаар аралык такси кызматын көрсөтүп жатканынын айырмасы жок. Оң рулдуу унаалар 2020-жылга бүгүнкүдөй эле жүрө алышат", — деди Өмүркулов.
Депутат Бакыт Төрөбаевдин айтымында, эгерде бул мыйзам кабыл алынса карапайым калкка пайдалуу болот.
"Жүргүнчүлөр ассоциациялары менен сүйлөштүк, алар мамлекетке 40-60 миллион сом киреше киргизебиз деп жатышат. Өкмөт менен болгон сүйлөшүүлөрдүн жыйынтыгында мыйзамды жылдыруу макулдугуна келгенбиз", — деди депутат.
Талкууну жыйынтыктап жатып Асылбек Жээнбеков 2020-жыл эмес, андан берки убакытты сунуштады.
"Айрым кызыкдар болгон топтун сунушу менен артка чегинип жатабыз. Андайда мамлекет алга жылбайт. Убагында өкмөт көз жумганы үчүн өлкөгө ушундай машиналар келип калган. Буга өкмөт күнөлүү", — деди спикер.
Кыргызстан боюнча 192 миң оң рулдуу унаа бар. 2014 жылы такси патенттерин сатуудан бюджетке 25 миллион сом түшсө, 2015-жылдын тогуз айында 17 миллион сом киреше кирген.
