БИШКЕК, 21-янв — Sputnik. "Ата Мекен" фракциясынын депутаттары унаа ээлерин жарандык камсыздандырууга сөзсүз милдеттендирүү боюнча мыйзамды 2020-жылга чейин жылдырып туруу керектигин айтышууда деп билдирди фракциянын маалымат кызматы.
Буга чейин фракция өкүлү Алмамбет Шыкмаматов, аталган мыйзамды быйыл токтотуп туруу боюнча мыйзам долбоорун даярдап жаткандыгын айткан.
Секретариаттан депутаттар эл дагы, өкмөт дагы буга азыр даяр эмес экендигин айтып келгендигин билдиришти.
"Каржылык каатчылык учурунда эл кыйналып, тарифтер, баалар көтөрүлүп, ал эми айлык төмөн бойдон калып жатканда автоунааны камсыздандыруу боюнча мыйзам элдин мойнуна түшкөн ашыкча жүк болот",— дешкен депутаттар.
7-февралдан тарта Кыргызстанда унаа ээлерин жарандык камсыздандырууга сөзсүз милдеттендирүү боюнча мыйзам иштеп баштайт. Темир тулпарлардын ээлери бири калбай 2,5 айдын ичинде камсыздандырган полис алышы керек. Ал эми буга моюн толгогондорго айып пул салынат.
