БИШКЕК, 10-авг. — Sputnik. Sim-карталарды каттоо мөөнөтү 2015-жылдын 1-октябрына чейин узартылганын Мамлекеттик байланыш агенттигинин маалымат кызматы билдирди.
Бардык уюлдук байланыш операторлорунун SIM-карталарын милдеттүү түрдө жекелештирүү өткөн жылы башталган жана 2015-жылдын 8-мартында аягына чыгышы керек болчу. Бирок уюлдук байланыш компанияларынын өтүнүчү менен каттоо мөөнөтү быйылкы жылдын 8-августуна чейин узартылган. Бир нече күн мурун бул компаниялар жекелештирүү толук аягына чыга электигине байланыштуу аталган мөөнөттү дагы узартууну сурашкан.
7-августта Агенттиктин статс-катчысы Абдисамат Сагымбаев уюлдук операторлордун өкүлдөрү менен жолукту. Ал агенттик тарабынан уюлдук байланыш абоненттерин каттоо процедурасын 2015-жылдын 1-октябрына чейин узыртылганы жөнүндө эскертүү жарыяланарын белгиледи.
Ошондой эле операторлорго жаңы сим-карталарды сатууну жана каттоодон өтпөгөн жаңы абоненттерди байланышка туташтурууну токтотуу, катталбаган абоненттер үчүн сырттан келген чалуудан 10 секунда мурун автоматтык түрдө билдирүү жиберүү (автомаалымдоочу) системасын киргизүү тапшырылды.
Мындан тышкары, уюлдук операторлор чек ара аймактарында SIM-карталарды каттоо боюнча топторду уюштурууга милдеттендирилди.
